top of page

কার্পণ্যপঞ্জিকাস্তোত্রম্

Updated: Sep 17, 2020




ধ্যানঃ । কোণেনাক্ষ্ণোঃ পৃথুরুচিঃ মিথো হারিণা লিহ্যমানা- বেকৈকেন প্রচুরপুলকেনোপগুঢৌ ভুজেন । গৌরীশ্যামৌ বসনয়ুগলং শ্যামগৌরং বসানৌ রাধাকৃষ্ণৌ স্মরবিলসিতোদ্দামতৃষ্ণৌ স্মরামি ॥ ১॥ অথ শ্রীকার্পণ্যপঞ্জিকাস্তোত্রং শ্রীবৃন্দাবনেশৌ জয়তঃ তিষ্ঠন্ বৃন্দাটবীকুঞ্জে বিজ্ঞপ্তিং বিদধত্যসৌ । বৃন্দাটবীশয়োঃ পাদপদ্মেষু কৃপনো জনঃ ॥ ১॥ নবেন্দীবরসন্দোহসৌন্দর্যাস্কন্দনপ্রভম্ । চারুগোরোচনাগর্বগৌরবগ্রাসিগৌরভাম্ ॥ ২॥

শাতকুম্ভকদম্বশ্রীবিডম্বিস্ফুরদম্বরম্ । হরতা কিংশুকস্যাংশূন্ অংশুকেন বিরাজিতাম্ ॥ ৩॥ সর্বকৈশোরবদ্বৃন্দচূডারূঢহরিণ্মণিম্ । গোষ্ঠাশেষকিশোরীণাং ধম্মিল্লোত্তংসমল্লিকাম্ ॥ ৪॥ শ্রীশমুখ্যাত্মরূপণাং রূপাতিশয়িবিগ্রহম্ । রমোজ্জ্বলব্রজবধূব্রজবিস্মাপিসৌষ্ঠবাম্ ॥ ৫॥


সৌরভ্যহৃতগান্ধর্বং গন্ধোন্মাদিতমাধবাম্ । রাধারোধনবংশীকং মহতীমোহিতাচ্যুতাম্ ॥ ৬॥ রাধাধৃতিধনস্তেনলোচনাঞ্চলচাপলম্ । দৃগঞ্চলকলাভৃঙ্গীদষ্টকৃষ্ণহৃদম্বুজাম্ ॥ ৭॥ রাধাগূঢপরীহাসপ্রৌঢিনির্বচনীকৃতম্ । ব্রজেন্দ্রসুতনর্মোক্তিরোমাঞ্চিততনূলতাম্ ॥ ৮॥ দিব্যসদ্গুণমাণিক্যশ্রেণীরোহণপর্বতম্ । উমাদিরমণীব্যূহস্পৃহণীয়গুণোৎকরাম্ ॥ ৯॥ ৎবাং চ বৃন্দাবনাধীশ ৎবাং চ বৃন্দাবনেশ্বরি । কাকুভির্বন্দমানোঽয়ং মন্দং প্রাঋথয়তে জনঃ ॥ ১০॥







॥ দশভিঃ কুলকম্ ॥ যোগ্যতা মে ন কাচিদ্ বাং কৃপালাভায় যদ্যপি । মহাকৃপালুমৌলিৎবাৎ তথাপি কুরুতং কৃপাম্ ॥ ১১॥ অয়োগ্যে সাপরাধেঽপি দৃশ্যন্তে কৃপয়াকুলাঃ । মহাকৃপালবো হন্ত লোকে লোকেশবন্দিতৌ ॥ ১২॥ ভক্তের্বাং করুণাহেতোর্লেশাভাসোঽপি নাস্তি মে । মহালীলেশরতয়া তদপ্যত্র প্রসীদতম্ ॥ ১৩॥ জনে দুষ্টেঽপ্যভক্তেঽপি প্রসীদন্তো বিলোকিতাঃ । মহালীলামহেশাশ্চ হা নাথৌ বহবো ভুবি ॥ ১৪॥ অধমোঽপ্যুত্তমং মৎবা স্বমজ্ঞেঽপি মনীষিণম্ । শিষ্টং দুষ্টোঽপ্যযং জন্তুর্মন্তুং ব্যধিত যদ্যপি ॥ ১৫॥ তথাপ্যস্মিন্ কদাচিদ্ বামধীশৌ নামজল্পিনি । অবদ্যবৃন্দনিস্তারিনামাভাসৌ প্রসীদতম্ ॥ ১৬॥ যদক্ষম্যং নু যুবয়োঃ সকৃদ্ভক্তিলবাদপি । তদাগঃ ক্বাপি নাস্ত্যেব কৃতাশাং প্রার্থয়ে ততঃ ॥ ১৭॥ হন্ত ক্লীবোঽপি জীবোঽয়ং নীতঃ কষ্টেন ধৃষ্টতাম্ । মুহুঃ প্রার্থয়তে নাথৌ প্রসাদঃ কোঽপ্যুদঞ্চতু ॥ ১৮॥ এষ পাপী রুদন্ন্ উচ্চৈরাদায় রদনৈস্তৃণম্ । হা নাথৌ নাথেতি প্রাণী সীদত্যত্র প্রসীদতম্ ॥ ১৯॥


হাহারাবমসৌ কুর্বন্ দুর্ভগো ভিক্ষতে জনঃ । এতাং মে শৃণুতং কাকুং কাকুং শৃণুতমীশ্বরৌ ॥ ২০॥ যাচে ফুৎকৃত্য ফুৎকৃত্য হা হা কাকুভিরাকুলঃ । প্রসীদতময়োগ্যেঽপি জনেঽস্মিন্ করুণার্ণবৌ ॥ ২১॥ ক্রোশত্যার্তস্বরৈরাস্যে ন্যস্যাঙ্গুষ্ঠমসৌ জনঃ । কুরুতং কুরুতং নাথৌ করুণাকণিকামপি ॥ ২২॥ বাচেহ দীনয়া যাচে সাক্রন্দমতিমন্দধীঃ । কিরতং করুণস্বান্তৌ করুণোর্মিচ্ছটামপি ॥ ২৩॥ মধুরাঃ সন্তি যাবন্তো ভাবাঃ সর্বত্র চেতসঃ । তেভ্যোঽপি প্রেমমধুরং প্রসাদীকুরুতং নিজম্ ॥ ২৪॥ সেবামেবাদ্য বাং দেবাবীহে কিঞ্চন নাপরম্ । প্রসাদাভিমুখৌ হন্ত ভবন্তৌ ভবতাং ময়ি ॥ ২৫॥ নাথিতং পরমেবেদমনাথজনবৎসলৌ । স্বং সাক্ষাদ্দাস্যমেবাস্মিন্ প্রসাদীকুরুতং জনে ॥ ২৬॥ অঞ্জলিং মূর্ধ্নি বিন্যস্য দীনোঽয়ং ভিক্ষতে জনঃ । অস্য সিদ্ধিরভীষ্টস্য সকৃদপ্যুপপাদ্যতাম্ ॥ ২৭॥ অমলো বাং পারিমলঃ কদা পরিমলন্ বনে । অনর্ঘেণ প্রমোদেন ঘ্রাণং মে ঘূর্ণয়িষ্যতি ॥ ২৮॥ রঞ্জয়িস্যতি কর্ণৌ মে হংসগুঞ্জিতগঞ্জনম্ । মঞ্জুলং কিং নু যুবয়োর্মঞ্জীরকলসিঞ্জিতম্ ॥ ২৯॥ সৌভাগ্যাঙ্করথাঙ্গাদিলক্ষিতানি পদানি বাম্ । কদা বৃন্দাবনে পশ্যন্ন্ উন্মদিষ্যত্যযং জনঃ ॥ ৩০॥


সর্বসৌন্দর্যমর্যাদানীরাজ্যপদনীরজৌ । কিমপূর্বাণি পর্বাণি হা মমাক্ষ্ণোর্বিধাস্যথ ॥ ৩১॥ সুচিরাশাফলাভোগপদাম্ভোজবিলোকনৌ । যুবাং সাক্ষাজ্জনস্যাস্য ভবেতামিহ কিং ভবে ॥ ৩২॥ কদা বৃন্দাটবীকুঞ্জকন্দরে সুন্দরোদয়ৌ । খেলন্তৌ বাং বিলোকিষ্যে সুরতৌ নাতিদূরতঃ ॥ ৩৩॥ গুর্বায়ত্ততয়া ক্বাপি দুর্লভান্যোন্যবীক্ষণৌ । মিথঃ সন্দেশসীধুভ্যাং নন্দয়িস্যামি বাং কদা ॥ ৩৪॥ গবেষয়ন্তাবন্যোঽন্যং কদা বৃন্দাবনান্তরে । সঙ্গময়্য যুবাং লপ্স্যে হারিণং পারিতোষিকম্ ॥ ৩৫॥ পণীকৃতমিথোহারলুঞ্চনব্যগ্রহস্তয়োঃ । কলিং দ্যূতে বিলোকিষ্যে কদা বাং জিতকাশিনোঃ ॥ ৩৬॥ কুঞ্জে কুসুমশয়্যায়াং কদা বামর্পিতাঙ্গয়োঃ । পাদসংবাহনং হন্ত জনোঽয়ং রচয়িষ্যতি ॥ ৩৭॥ কন্দর্পকলহোদ্ঘট্টত্রুটিতানাং লতাগৃহে । কদা গুম্ফায় হারাণাং ভবন্তৌ মাং নিয়োক্ষ্যতঃ ॥ ৩৮॥ কেলিকল্লোলবিস্রস্তান্ হন্ত বৃন্দাবনেশ্বরৌ । কর্হি বর্হিপতত্রৈর্বাং মণ্ডয়িষ্যামি কুন্তলান্ ॥ ৩৯॥ কন্দর্পকেলিপাণ্ডিত্যখণ্ডিতাকল্পয়োরহম্ । কদা বামলিকদ্বন্দ্বং করিষ্যে তিলকোজ্জ্বলম্ ॥ ৪০॥ দেবারম্ভে বনস্রগ্ভির্দৃশৌ তে দেবি কজ্জলৈঃ । অয়ং জনঃ কদা কুঞ্জমণ্ডপে মণ্ডয়িষ্যতি ॥ ৪১॥


জাম্বূনদাভতাম্বূলীপর্ণান্যবদলয়্য বাম্ । বদনাম্বুজয়োরেষ নিধাস্যতি জনঃ কদা ॥ ৪২॥ ক্বাসৌ দুষ্কৃতকর্মাহং ক্ব বামভ্যর্থনেদৃশী । কিং বা কং বা ন যুবয়োরুন্মাদয়তি মাধুরী ॥ ৪৩॥ যয়া বৃন্দাবনে জন্তুরনর্হোঽপ্যেষ বাস্যতে । তয়ৈব কৃপয়া নাথৌ সিদ্ধিং কুরুতমীপ্সিতম্ ॥ ৪৪॥ কার্পণ্যপঞ্জিকামেতাং সদা বৃন্দাটবীনটৌ । গিরৈব জল্পতোঽপ্যস্য জন্তোঃ সিধ্যতু বাঞ্ছিতম্ ॥ ৪৫॥ ইতি শ্রীরূপগোস্বামিবিরচিতস্তবমালায়াং শ্রীকার্পণ্যপঞ্জিকাস্তোত্রং সমাপ্তম্ ।

Comments


Be Inspired
bottom of page